07 February 2010

Aistear anama

Tá "An Branar gan Cur" le Breandán Ó Doibhlin díreach críochnaithe agam. Tá foclóir leathan ag an Doibhlinneach, rud a fhágann go bhfuil stró neamhghnách ag baint le saothar dá chuid a léamh, agus thóg sé i bhfad orm bheith ar mo chompord leis an leabhar.

Tá an úrscéal spéisiúil seo suite i traein ó Bhaile Átha Cliath go Doire. Tá an laoch ar a shlí ó thuaidh, abhaile ar chuairt. Ag tús an scéil tá an cuma ar an scéal go bhfuil cinneadh déanta aige conas an chuid eile dá shaol a chaitheamh - dul le sagartacht. Sruth smaointe, agus an aistear traenach mar fráma dóibh, atá san úrscéal. Cíorann sé a shaol agus a chuid caidrimh le daoine eile - agus imíonn a chinnteacht le fána.

Tá léargas ar saol an fhir cúise, an léachtóir ollscoile, aos gnó Bhaile Átha Cliath, agus na ciorcail eile a thagann sé i dteagmháil leo san scéal. Léargas freisin ar féiniúlacht an náisiúnaí tuaisceartach, agus an neamhaird agus col a bhraitheann pobal an deiscirt leo.

Tríd is tríd, sílim gurbh fiú an tairbhe an trioblóid a chuir foclóir leathan Uí Dhoibhlinn orm! Is dócha freisin go mbeadh a leathbhreac de leabhair i mBéarla nó i nGearmáinis léite níos sciobtha agam - agus gurbh ormsa seachas ar siúd an locht. Easpa taithí ar an saghas seo litríochta.

An Branar Gan Cur.
Breandán Ó Doibhlin.
Sáirséal – Ó Marcaigh 1984
ISBN 086289025

6 comments:

ormondo said...

Ach níl tú ag rá go bhfuil an leabhar seo ar aon chéim leis an gCadhnach ó thaobh na deacrachta de?!! ;-)

aonghus said...

Níl. Bhí sé ar mo chumas an scéal a thuiscint fiú murar thuig mé gach focal. Le gearrscéalta an Chadhnaigh, ní mar sin a bhíonn.

Cailliomachas said...

Léigh mé é roinnt blianta ó shin agus aontaím leat is fiú an tairbhe an trioblóid. Ach bhraith mé ag am gur léargas ar fhís an laoich a bhí ann agus nár domsa an fhís sin.

aonghus said...

An cheist a tháinig chugamsa ná cé mhéid den Doibhlinneach atá san laoch. An léargas é seo ar an ród nár thóg sé?

Cailliomachas said...

Rith sin liomsa freisin. Ach 'intinn an údair'? Cá bhfios!

Colm Mac Fhionnghaile said...

Táim díreach ag toiseacht ar an leabhar seo anois agus is comhartha dóchais an aiseolas dearfach atá feicthe agam anseo.