25 May 2010

Éisc, sceallóga agus Iodálaigh

Agus mise ag fás aníos i dTír an Iúir, is beag bialann a bhí ann. Ach bhí siopa sceallóga ann. Agus is teaghlach Iodálach, gan amhras, a bhí ina bhun. Ó shin i léith tá gach dara siopa beagnach i sráidbhaile Tír an Iúir claochlaithe ina phroinnteach, bia de chuid gach chine faoin spéir, agus 'chaon ceann acu níos ardnósaí ná a chomharsan. Muintir an chipper féin, d'oscail siad trattoria traidhfil de bhlianta ó shin. Ach fadó, rud mór ab ea é béile teaghlaigh a fháil ón chipper. (Tá muirir mór ar mo mhuintir! ach fuair muid margadh maith i gcónaí, cionn is gur chuir mo mháthair oideachas réamhscoile ar pháistí an teaghlaigh!)

Ní bhím ag ithe sceallóga ró mhinic anois - is fearr liom rud éigin níos folláine de ghnáth. Ach ó am go chéile, bíonn sceallóga agam, agus iasc leo nó uaireanta spice burger.

Tá sé tugtha faoi ndeara agam mar sin go bhfuil roinnt siopaí anois ag léiriú suaitheantas an Chumainn Éireannach sceallairí Iodálacha Traidisiúnta.1

Tá an 26ú Bealtaine - amárach - fógartha ina Lá Náisiúnta Sceallóga agus Iasc acu.

Is mithid.

Is cuid dár n-oidhreacht é cinnte; agus b'iad na Gael iodálaigh cinnte an glúin is feiceálaí d'inimircigh agus mé ag fás aníos: is maith ann an nasc, agus is mithid é a cheiliúradh.

Íomhá ó Wikimedia; le Tannin.

1Tá beachtóir de dhíth orm chun Gaeilge chruinn a chuir ar an lán béil seo d'ainm!

5 comments:

SeanO said...

Bhí a leithéid chéanna againn in Rialto. Muintir Pacetti a bhí ina bhun agus i dteannta gnó an ‘chipper’ bhí uachtar reoite den scoth ar fáil ansin. N’fheadar cá mhéad Béarla a bhí ag na hoibrithe mar bhí cód ar leith á úsáid agus duine ag ordú: ‘one and one’ nó ‘one and two’ nó ‘two and two’. Tagraíonn an chéad uimhir don iasc agus an dara ceann do na sceallóga.

Mise Áine said...

Íosfaidh mé sceallóga amárach, i gcuimhne na n-iasc bocht...:-)

aonghus said...

@Seán Ní raibh an cód sin cloiste agam cheana; ach luaigh duine eile liom anocht é.

@Áine: bain súp astu!

Míshásta said...

Conas, in ainm an diabhail, ar thit sé amach gur chuir daoine, as dtír a bhfuil ainm in airde acu ó thaobh na cócaireachta de, tús le meascán chomh mí-fholláin le 'iasc i bhfuidreamh'.

Ní dóigh liom go n-itear a leithéid san Iodáil.

aonghus said...

Cuireann an fear gnó glic a sholáthair in oiriúint don mhargadh!