22 June 2012

SCOLÁIRE

Tabhair a dhóthain den ardléann do Ghaeilgeoir agus ní Gaeilgeoir a thuilleadh é ach SCOLÁIRE. Agus, a chairde mo chléibh, is iontach na héanacha iad na scoláirí nuair a bhaineann siad amach beanna arda an léinn mhóir. Tugann siad gráin don uile fhocal den teanga Ghaeilge ach na focla a bhfuil seacht sreama na seanaoise orthu.  Níl canúint is fearr leo ná an chanúint atá marbh le céad bliain.
Bíonn a chanúint fhéin ag gach duine acu agus murar féidir leat í sin a labhairt leo go clocharach pislíneach mar is dual labhróidh siad Béarla leat. Bíonn Béarla an-bhreá acu go hiondúil. Le fírinne agus leis an gceart bíonn sé acu chomh maith nó níos fearr ná an Ghaeilge féin. Béarla gan chanúint a chleachtann siad, rud a chuireann ar a gcumas labhairt le formhór chuile Bhéarlóir. Buntáiste mór é seo gan dabht.
        Breandán Ó hEithir, Feabhra 1958

4 comments:

SeanO said...

Ceart go leor, mar nach bhfuil a leithéid sin de SCOLÁIRE ar aithne ag chuile dhuine a bhfuil go fiú blúirín Gaeilge aige. An cheist atá agamsa ná cad a spreag tú chun an racht sin ó shaothar Uí Eithir a chur os ár gcomhair?

An Cainteoir Dóchais said...

Tá sé greannmhar toisc go bhfuil sé fíor.

Mise Áine said...

@ go clocharach pislíneach

Iontach, mar íomhá..:-)

@ cad a spreag tú

Mo cheistse, freisin.

aonghus said...

Thaitin an blúire liom nuair a chéad léigh mé (san leabhar "An Chaint sa Sráidbhaile", cnuasach colúin leis)

Tá sé ag mo leathanach idirlín agam ó na 1990í.

Meabhraíodh dom inné é i gcomhrá ar Twitter nuair a luaigh duine go ndúirt ollamh leis nach focal é "aintín". Chosc siad air scata focail eile a úsáid freisin.

De bhrí nach bhfuil smacht agam ar an leathanach úd níos mó, agus nach fios dom cathain a imeoidh sé le sruth, bheartaigh mé ar é chuir in airde abhus.