Pícaro ar fán

Tá an dara eachtra de chuid Corto Maltese foilsithe ag Leabhar Breac anois. Agus ceannaithe agam (do mo mhac, mar dheá, ach sílim nach bhfuil an céad imleabhar léite i gceart aige fós, rudaí eile níos tarraingtí dó).

Bhí muid á phlé ar Twitter agus d'fhiafraigh Dennis an picaresque atá sé. Ní raibh fhios agam féin go baileach cad is brí le picaresque (scéal faoi rógaire dar le focal) mar sin bhí orm beagán taighde a dhéanamh.

Níl aon cheist ach gurbh rógaire é Corto Maltese, é anseo i gceantar suaite na teorainne idir an Tuirc, an Airméin agus na críocha sin, ar thóir ar órchiste agus ag iarraidh a chomrádaí Rasputin (a bhí san gála deiridh freisin) a tharrtháil. Ansin cuirtear casadh san scéal agus é ag iarraidh cailín Airméanach a tharrtháil, an t-aon marthanóir dá teaghlach tar éis áir.

Tá scata bé eile san scéal, agus cairde a thagann i gcabhair ar Chorto gach uair a bhíonn sé i bponc.

Arís tá an plota sách scaoilte - áiféiseach fiú, ach is léitheoireacht thaitneamhach atá san scéal, gan mórán doimhne. Pearsa aisteach Corto - rógaire ach iarracht éigin den uaisle ag baint leis freisin, de chúirtéis an ridire.

Arís, molaim Leabhar Breac as an obair atá á dhéanamh agam - cloisim go bhfuil gála eile ar na bacáin, agus leabhar eile tiontaithe ón bhFraincis - Cadavre Exquis le Pénélope Bagieu atá ag dul i dtreo eile ar fad. Treise leo!

An Teach Órga i Samarkand

€12.00 (bog), 256 lch;
ISBN 1 909907 43 0

Port na Farraige Goirt

Ní léitheoir mór úrscéalta grafaice mé, ach tá spéis ag mac liom i Manga agus thug sin leithscéal dom an leabhar seo ó Leabhar Breac a cheannach. Agus é ceannaithe, rinne mé é a léamh, dar ndóigh!

Maidir leis an laoch Corto Maltese agus a údar Hugo Pratt, tá alt spéisiúil ag Panu ar An Tuairisceoir. Don té atá fiosrach, tá breis eolais i gcartlann Hugo Pratt.

Maidir liom féin, nílim iomlán cinnte. Is eachtraí laistigh de fhráma a chuirtear inár láthair - bhraith mé féin go raibh bearna sa phlota. Mar sin féin gaisceoireacht pléisiúrtha atá ann, bithiúnaigh agus laochra, mistéir, corr agus casadh, bruinneall dathúil (ar ndóigh), bundúchasaigh glice i dtiúin leis an muir, polaitíocht na cruinne ar thairseach cogaidh,  agus araile.

Is dóigh liom go mbeadh fonn orm an chéad gála eile a léamh freisin.

Is maith liom an méid atá ar bun ag Leabhar Breac; tá's ag an saol go bhfuil poll ann i leabhair Ghaeilge idir na cinn do leanaí agus na cinn do dhaoine fásta a bhfuil frídín an léamh liteartha tolgtha acu cheana. Táim dóchasach go bhfuil Leabhar Breac ag tús cadhnaíochta ag líonadh an phoill sin le hábhar a chuideoidh breis léitheoirí Gaeilge a earcú. Treise leo!

Port na Farraige Goirt
Hugo Pratt
€12.00 (bog), 256 lch;
ISBN 0 898331 02 0

Iníon Keevack

Ag éirí as an píosa a scríobh mé faoi Scéalta Ó Oileán An Turtair luaigh Marcus an leabhar Iníon Keevack liom agus chuir mé fios ar ón leabharlann.
Ní raibh aon iomrá cloiste agam roimhe ar an údar Mícheál Ua Ciarmhaic.
Úrscéal spleodrach atá anseo, lonnaithe i dTuaisceart Mheiriceá, a mheabhródh duit scéalta Jack London faoi bheith ar an lorg. 
Eachtra tóraíochta agus grá. Bhí an cur síos ar an dúlra agus na heachtraí fán mbealach fíor mhaith. Bhraith mé áfach go raibh an cur síos ar na caidreamh beagán amscaí. Ní raibh Aintín Mildred, a bhí ina cineál leasmháthair olc san scéal, inchreidte dar liom; agus ní raibh gá ar bith leis an daor Seoirse Buí.
Shíl mé i dtosach nach raibh meascán drúis agus Críostaíocht saonta Sheáin agus fiántas ach geanmnaíocht Neeta réalaíoch, ach nílim chomh cinnte den sin théis roinnt machnamh a dhéanamh air. Ní bhíonn daoine iomlán i gcomhréir lena bhfealsúnacht ina mothúcháin.
Scéal ana mhaith atá ann, agus le roinnt beag eagarthóireacht liteartha d'fheadfadh sé bheith ina shár-scéal i seánra atá sceadach go leor in iothlainn na Gaeilge , eadhon, eachtraíocht agus rómáns d'aosánaigh.

Lón aigne agus samhlaíochta, friotal thaitneamhach, fileata. Inmholta.

Iníon Keevack
Micheál Ua Ciarmhaic
ISBN 185791 142 3
An Gúm 1996