Sceitheadh oscailte

Lógó openleaks.org

Bhí alt suimiúil eile san Tagesspiegel, maidir le Openleaks. Seo dream saorálaithe a d'fhág Wikleaks de bharr deacrachtaí le stíl cinnireachta Julian Assange; agus míshuaimhneas de bharr go raibh sé ag díriú fuinneamh iomlán na heagraíochta ar na sreangscéalta Meiriceánacha, agus neamhaird á dhéanamh ar sceitheadh eolais ó fhoinsí eile.

Cuir chuige eile atá faoin dream seo a eagrú. Beidh siad ag cuir bosca poist leictreonach rúnda ar fáil do sceithirí.

Beidh deis ag an sceithire an eagraíocht atá leis an eolas a fháil a roghnú. Má theipeann ar an eagraíocht sin gníomhú laistigh de am áirithe, sceithfear an t-eolas ar na heagraíochtaí ar fad atá nasctha le openleaks.

Tá sé i gceist go mbeadh an eagraíocht é féin trédhearcach, agus go mbeadh eagraíochtaí eile ag dul i mbannaí ar cé chomh iontaofa is a bheidh an trealamh agus an córas atá in úsáid.

Caithfidh mé a rá go maolódh cuir chuige mar sin m'amhras beagán. Táim fós amhrasach faoi sceitheadh rúin - go háirithe nuair is faoi rún atá an sceithire ag feidhmiú. Chím go bhfuil áit agus gá leis; agus gur féidir le sceitheadh dá shórt a bheith ceart agus riachtanach. Ach ní mór a bheith cúramach nach bhfuiltear ag déanamh ceithearnaigh i gcluiche rúnda níos mó ag lucht sceite an eolais. Féach go bhfuair muid amach tar éis na blianta gurbh leascheannaire an FBI a sceith rúin Nixon maidir le Watergate - de bharr naimhdeas d'iarrachtaí Nixon atheagar a chuir ar an FBI.

Is mithid an cheist maidir le cé atá baint cén leas as gníomh a chuir i gcónaí!

Táim gúgláilte!

Le tamall anuas táim an-spléach ar Ghoogle agus mé ar líne.

Bainim feidhm as gmail. Agus as bailitheoir sruthanna Google. Agus, gan amhras, as blogspot - atá ina chuid d'impireacht Ghoogle le tamall. Sin gan trácht ar chuardach Google. (A t-aon chuid atá ar fáil as Gaeilge go dtí seo).

Cuireann sé buairt orm uaireanta a oiriúnaí agus atá roinnt de na fógraí a chuireann siad faoi mo bhráid, anois agus na sonraí ar fad ón cumasc thuas á scagadh acu. Údar faoiseamh é go mbíonn roinnt acu go hiomlán ar strae.

Ach, cad a tharlódh má tharlaíonn an t-eolas scagtha seo i nglac feidhmeannacht éigin Kafka-ach amach anseo?

Tá lorg digiteach sách fada agamsa - ag dul siar go dtí 1996. Ní dhearna mé riamh iarracht m'aitheantas a cheilt, agus tá sé pas mall anois. Táim réasúnta sásta nach bhfuil aon rud a mbeadh náire orm faoi san tobar gan bhun digiteach seo, cé go bhfuil roinnt mhaith baoise a chuireann aiféala orm.