28 November 2009

Aoirí Bradacha

Breis cúis náire nochtaithe ag Tuarascáil Uí Mhurchú.

Tá sé tromchúiseach go ndearna Ardeaspaig thar na blianta neamhaird iomlán ar Dhlí Dé, Dlí Canónach na hEaglaise agus Dlí an Stáit agus iad ag plé - nó gan a bheith ag plé - le ciontóirí gnéis imeasc an chléir.

Ní dúirt Críost riamh "Ná Fiafraigh, ná hInis".

Tá muinín agam as an Ardeaspag reatha, a seoladh anseo ón Roimh d'aon ghnó chun na Stáblaí Áigéis seo do ghlanadh. Cúis imní é áfach gurbh é breith an Choiste go bhfuil feabhas tagtha ar chleachtais an Ard Deoise - ach go bhfuil na gnáis spléach ar dhíograis an Ard Easpaig agus an duine i bhfeighil cúram paistí. Ní leor sin.

Cúis imní é freisin an súil dall a thug na Gardaí agus an Stát do choireanna cléirigh. Ní dóigh liom go bhfuil an gné sin ann anois - níl an urraim míchuí sin ann don chléir níos mó. Ach céard faoi daoine eile faoi urraim? An gcuirtear an dlí i bhfeidhm gan aird ar stádas an chúisí?

Tá súil agam go dtiocfaidh íonghlanadh as seo - don Eaglais, agus don Stáit. Agus go mbeidh faoiseamh éigin ann dóibh siúd a milleadh a saolta athuair de bharr neamhaird, sotal nó fiú cos ar bolg nuair a rinne siad clamhsán. Cos ar bholg ní hamháin ón gcléir, ach ón bpobal fré chéile.

Lá dubh eile i nochtadh ár stair.

4 comments:

ormondo said...

Mí-úsáid ó thús go deireadh
na cumhachta a bhí an an eaglais ós rud é go raibh na seanglúine go mór faoi smacht agus faoi gheasa ag an chléir. Chuireadh sé déistin orm riamh an chaoi ina mbíodh an tréad ag lútáil go talamh dos na bodaigh chéanna.

Cén fáth nach gcuirtear an dlí orthu faoi mar a chuirfí an dlí ar ghnáthduine? An bhfuil pribhléid na díolúine acu?

Mise Áine said...

Feictear dom go bhfuil go leor daoine ann nach gcuirtear an dlí céanna orthu agus a chuirtear ar an ngnáthmhuintir, a Ormondo.

'faoiseamh' a Aonghuis? Ní dóigh liom é, ach b'fhéidir ceacht foghlamtha againn maidir le cumhacht thar cuimse a thabhairt do ghrúpa, ná duine ar leith.

aonghus said...

Faoiseamh sa mhéid is go bhfuil aitheantas poiblí anois gur inis siad an fhírinne. Chuala mé barraíocht scéalta le cúpla lá faoi daoine cráifeacha a rinne an rud ceart agus a d'íoc go daor as.

Mise Áine said...

Ar ndóigh, bhí na daoine cráifeacha sin ann, a chara, agus is mór an trua gur tharla a leithéid, agus gur íoc siad go daor as - go háirithe agus an pionós ag teacht ó na húdaráis sin inar chuir siad féin muinín.

Nach iad na daoine maithe a fhulaingíonn i gcónaí, deirtear...