04 February 2011

Ríomhaithne

Spreag sraith túíteanna le Scott an mír seo.

Soiléiriú: Ní ag tagairt domsa, ná go deimhin aoinne a bhfuil aithne agam a bhí sé. Ach chuir an méid a scríobh sé na smaointe im chloigeann (arís)

Síleann muid go bhfuil aithne éigin againn ar an dream a mbíonn muid ag cumarsáid leo ar líne. Tá caidreamh ann, cinnte - ach is caidreamh measartha cúng atá ann. Fiú má bhíonn daoine go hiomlán ionraic, is aghaidh fidil fós an rud a mbíonn muid ag cumarsáid leis - bunaithe ar an méid atá scríofa amháin. Nuair a bhuaileann muid le daoine san fíor saol, bíonn an dúrud eolas ar fáil do na céadfaí ar fad - cuid de, eolas nach bhfuil faoi smacht fiú ag an duine a bhfuil muid ag plé leo, atá ann. Ní hamhlaidh ar líne - tá mórán chuile rud comhfhiosach, roghnaithe, scagtha. Agus is iomaí nod atá in easnamh - cailltear íoróin, greann, spraoi go minic.
Ní mór a bheith cúramach mar sin agus gan glacadh leis an samhail atá againn de dhuine mar an fíor dhuine. Agus a bheith réidh agus toilteanach an íomhá a leasú!
Is cuimhin liomsa uair nó dhó bheith geal le maslaithe ag freagra ar rud éigin a scríobh mé a thug le fios go raibh íomhá díom, a bhraith mé bheith go hiomlán bunoscionn le m'fhéiniúlacht, ag duine. 
Ní gan chúis an mbíonn bladhmchogaí ar an idirlíon, spreagtha uaireanta ag mion míthuiscintí!

Meabhraíonn sé an mhír seo dom:

Nóta staire do foclóirithe: Focal a mhúnlaigh Kay Uí Chinnéide ar Ghaeilge A i bhfad siar, spreagtha ag ceist uaimse: ríomhaithne

5 comments:

Dennis King said...

Spreag sraith túiteanna...

An iad tootanna nó tweetanna atá i gceist agat?

Is maith liom an t-aingeal sin!

aonghus said...

Teachtaireachtaí Twitter.

aonghus said...

"túíteanna" a bhí fúm scríobh, leasaithe anois.

Mise Áine said...

Ní fhaca mé na túíteanna a bhí i gceist, a Aonghuis, ach, mar a dúirt tú, 'is caidreamh measartha cúng' atá sa chaidreamh anaithnid idirlín, agus is fearr gan dearmad a dhéanamh air sin, agus muid ag scríobh linn...;-)

aonghus said...

Ba cheart go mbeadh sé ráite agam nach domsa a bhí sé ag tagairt. Sin déanta anois agam.