31 May 2011

Fógraí atá feidhmeach - agus spéisiúil

Chonaic mé an fógra ar chlé agus mé ag siúl i bPoblacht na Seice. Is maith liom na deismíneachtaí beaga - hata an fhir, ribín an chailín.  Feictear dom nach mbaineann siad ó fheidhm an fhógra - go deimhin sa mhéid agus go bhfuil an fógra níos tarraingtí ná a mhacasamhail abhus, b'fhéidir go gcuireann siad leis. Mheabhraigh an fógra na "Ampelmännchen" i mBeirlín dom (féach thíos). Tá a stair spéisiúil fhéin ag na firíní beaga seo, a rugadh sa chumannachas agus a bhí le díothú ag an gcaighdeánú Iartharach tar éis 1989. Tógadh raic, áfach - agus tá siad anois le feiceáil ar sráideanna thoir agus thiar sa Ghearmáin. Ní hamháin sin, ach tá siad ina gcaipitlithe cearta, le siopa dá gcuid féin agus an dúrud earraí le fáil ann!
Is maith an rud nóta beag ealaíonta le nithe feidhmiúla seachas an loime is gnách ar fógraí agus a leithéidí. Rud atá caillte againn san aois tionsclaíoch, ach a bhíodh coitianta nuair a rinneadh earraí le lámh - agus le grá! Is maith ann an maisiúchán.

6 comments:

Mise Áine said...

@ deismíneachtaí

Focal deas, nach raibh agam!

@ Is maith ann an maisiúchán.

Aontaím...

aonghus said...

Focal nach raibh agamsa ach oiread go ndeachaigh mé sa tóir ar an bhfocal cuí!

John said...

M'anam, ach nach bhfuil géaga fada ar an gcailín sin? Ní haon ionadh go bhfuil na hIar-Eorpaigh chomh maith sin ag an ngleacaíocht!

John said...

GML, na hOir-Eorpaigh!

Seosamh Ó Beirgin said...

Is cuimhin liom na hAmpelmenchen sin ó turas a rinne mé go Beirlín siar i 1990.

Colm Ó Broin said...

"Focal nach raibh agamsa ach oiread go ndeachaigh mé sa tóir ar an bhfocal cuí!"

Crois bheag atá le hiompar againn ar fad - má thagann eolaí éigin ar bhealach chun foclóir Uí Dhomhnaill a ioslódáil in intinn an duine beidh mé sásta a bheith páirteach sa staid turgnamhach.