27 September 2009

Plionta folamh


Bhí mé amuigh sna sléibhte le mo mhac inniu, thart ar Ghleann Crí. Bhíodh dealbh de Chríost, an tréadaí maith ar an mbóthar míleata ós cionn an Ionad Athmhuintearais. Tá an dealbh imithe le roinnt blianta anois. Ach thug mé suntas don plionta.
Scoil cheartúcháin - príosún do bhuachaillí faoi aois - a bhí i gceist le scoil Chaoimhín. Luaitear i dtuarascáil Ryan é, cé go bhfuil an cuid is measa ag tagairt do cad a tharla sa Daingean nuair a dúnadh Gleann Crí.

Ní go ró mhaith a fheileann an méid atá luaite ann leis an Tréadaí Maith.

Theip muid mar phobal ar na buachaillí - agus b'fhéidir freisin ar na bráithre, má chuirtear san áireamh, mar atá luaite san Tuarascáil, gur theip an néaróga chuid mhaith acu. Córas lofa - ach tá amhras orm go bhfuil mórán feabhas tagtha air ó shin.

Bhí an mír seo i soiscéal an lae inniu: "Ach má thugann aon duine scannal do dhuine ar bith de na rudaí beaga seo a chreideann ionamsa, b’fhearr dó go gcuirfí bró mhuilinn faoina mhuineál agus é a chaitheamh san fharraige."

Cad ba cheart dúinn a dhéanamh? Arís inniu, tá buachaill 17 bliain d'aois faoi ghlas de dheasca fear a shá. Tá goid agus réabadh fós ar siúl, de bharr go bhfuil bochtanas agus fearg fós linn.

Níl fhios agam. Go bhfóire an Tréadaí Maith orainn go léir.

6 comments:

Dennis King said...

an Tréadaí MHaith... cén fáth an séimhiú?

aonghus said...

Ní heol dom!

Cailliomachas said...

Is minic a rith an chuid sin de na soiscéil liomsa freisin sa chomhthéacs céanna seo agus an chaint ar siúl sna meáin. Is cosúil go raibh Iognáid Rís é féin i gcoinne fhoréigin in éadan daoine óga. Tar éis dó bás a fháil thosaigh a chuid scoileanna ag déanamh aithrise ar mheánscoileanna Shasana, is cosúil. Ach ní féidir locht a fháil ar Shasana faoinar tharla ina dhiaidh sin. Sinn féin amháin a bhí ciontach - nó na hinstitiúidí ar thugamarna an t-údarás dóibh.

aonghus said...

An rud is measa faoi seo ná go raibh fhios ag daoine cad a bhí ag tarlú. Bhí sleachta san tuairisc a léigh mé aréir a bhí ana dheacair - dochtúir de chuid na roinne nach bhfaca faic cearr leis an mbrúidiúlacht. Ach níos measa fós - an fear a bhí i gceannas ag rá gur chuir an buaileadh isteach air - isteach ar a chuid paidreacha - ach gur mheas sé nár cheart dó aon rud a dhéanamh.

Déarfainn gur chuir an scéal seo arraing tríd croíthe bunaitheoirí na nOrd seo i gcoitinne.

fearn said...

Seanscéal é cinnte an mbíonn na "seallaigh" freagrach as gan faic a rá, as gan faic a thabhairt faoi dheara, as gan rud fiúntach a dhéanamh. Scéal Cáin agus Abail.

Ach an raibh "fhios" againn faoi Uilesoisceadh na nGearmáineach, nó cinedhiothú sa Ruanda, nó sa Chambóid.

Maidir leis na páistí, is ciontaí sinn go léir is dócha, le fada an lá: féach "Du soll Nicht Merken" le Alice Miller agus na leabhthaí eile aici.

Is dóigh gur coir é fanacht ciúin, neamhshuim a thaispeáint.

Cad iad na coireanna atá ar bun inniu gur cuma linn ina dtaobh?

aonghus said...

Freagra do cheiste, a Dennis.

Rinne mise botún cion is go raibh an leagan reamhchaighdeánach "dealbh so an tréadaidhe mhaith" ar an bplionta.

Leasaithe anois agam!