14 August 2009

Idir dhá Chomha[i]r[le]

Tá deireadh tagtha leis an síntiúis atá agam le Comhar. Bhíodh síntiúis agam i bhfad ó shin, ag tosú agus mé ar an ollscoil, ach d'éirigh mé as san 1990í, ceal spéis. Gníomh dlúthpháirtíochta a bhí ann síntiúis a ghlacadh arís, spreagtha ag Conchubhar tráth go raibh deireadh curtha leis an ndeontas.

Bhí an cuma air go raibh feabhas ag teacht ar an iris faoi stiúir Aindrias Ó Cathasaigh, go dtí gur éirigh idir é agus an bhord. Tá an scéal truamhéalach úd cíortha go mion anseo.

Anois, níl mé orthu siúd nach bhfeiceann fiúntas ar bith i saothar eagarthóireachta Phól Uí Mhuirí. Feictear dom go bhfuil an-obair ar siúl aige san Irish Times.

Ach ní fheictear dom gur fiú €65 sa bhliain Comhar domhsa. (Dála an scéil, sin ardú suntasach ar an €50 a d'íoc mé cheana).

Cé go mbainim taitneamh as scagadh Ghabriel Rosenstock ar na meáin neamh Angla Sacsanach i Howl agus Abhus, tá ailt seasta eile ann nach bhfuil an téagar leo a bheinn ag súil leis in iris.

Feictear dom gur blagadóireacht i gcló atá ar bun ag Mícheál Ó Ruairc (LE hAER AN tSAOIL) agus Rachel Ní Fhionnáin (OS MO CHOMHAIR). Ach tá flúirse de sin ar fáil ar líne dom, saor in aisce.

Cinnte, bíonn sár ailt agus scéalta ann, uaireanta. Mar shampla, scéal Miha Mazzini in eagrán na míosa seo, aistrithe ag Gabriel Rosenstock - Scéal An-Simplí.

Feictear dom áfach go bhfuil an iris ag bráth ar ciorcal an-bheag de scríbhneoirí, agus na scríbhneoirí sin ag cíoradh na téamaí céanna mí i ndiaidh míosa.

Bainim níos mó adhmaid as Feasta.

I ré an idirlín, caithfidh iris a bhfuilim ag íoc as rud éigin sa bhreis a thairiscint. Feictear dom go bhfuil an chonair ceart á leanacht ag Cailliomachas Feasta - ag cíoradh pointí ar líne, agus ag cuir alt dlúth eagraithe i gcló.

Go deimhin, tá suíomh idirlín ag Feasta, agus Comhar taobh le blag nach mbaintear feidhm as ach chun clár an iris a fhoilsiú.

Mar sin, ní bheidh mé ag athnuachan mo shíntiúis.

12 comments:

Cú Chonnacht said...

Faraor, caithfidh mé a rá go dtagaim le chuile fhocal scríofa agat.

Ba chailliúint mhór imeacht Uí Chathasaigh, go háirithe le linn an chúlaithe eacnamaíochta is mó ar domhan ag dul ar aghaidh. Rud a ba chóir a bheith pléite go míosúil i gComhar.

Proinsias Mac a' Bhaird said...

Seans go bhfuil an ceart agat. Caithfidh mé a rá gur bhain mé sult as eagrán na míosa seo, cé nach dtiocfadh liom an rud céanna a rá faoi gach aon eagrán.
Ag tagairt do Mhíchéal bocht. Chuaigh mo chroí amach dó: leath-úrscéal caillte aige ar an ríomhaire!Chuaigh mé caol díreach chuig mo ríomhaire beag féin agus rinne mé dhá chóip leictreonach de shaothar atá idir lámha agam san am i láthair!

aonghus said...

Tá súil agam go bhfuil ar a laghad cóip amháin díobh neamhspleách ar do ríomhaire! Ar maide USB nó a leithéid.

Dennis King said...

"Howl agus Abhus", an ea? Tá cara liom, Breatnaiseoir Californiach a bhfuil léamh na Gaeilge aige, a d'aistrigh na focail sin go "Hall is a wuss" na blianta ó shin. Tá an t-ainmfhocal "wuss" beagán passé anois agus níl a fhios agam an raibh sé in úsáid riamh in Éirinn.

Séamas Poncán said...

Bain triall as An Gael, freisin, a dhuine chóir.

ormondo said...

Tá alt nó dhó den scoth (tagarmharc: Rosenstock) de dhíth ar an iris fós.

aonghus said...

An an Gael atá i gceist agat, a Fhearghuis? Bhfuil an iris léite agat, nó bhfuil tú ag bunú do thuairim ar an gclár?

Chaith mé súil ar ar ball, ach feictear dom go bhfuil sciar maith den ábhar léite ar líne agam cheana. Ach tá sé i gceist agam é cheannach amach anseo.

ormondo said...

Comhair a bhí i gceist agam, a Aonghuis. Níor bhaineas triail as an gceann eile fós.

Pé scéal é, bhí Comhar á léamh agam inniu arís agus caithim a rá go bhfuil sé ag dul i bhfeabhas cé go bhfuil an ceart agat maidir leis an ngné bhlagach de.

Ní fhéadaim a rá, áfach, go bhfuil coincheap na hirise soiléir dom fós; smörgåsbord, b'fhéidir?

aonghus said...

Ba chuma liom smörgåsbord, ach má tá gach ré slis stálaithe...

ormondo said...

...caithimid dul i muinín an tóstaeir, screamh spéisiúil na seanaoise ar nós patina a chur orthu agus ansin isteach leo san iarsmalann!

SeanO said...

Comhar

Do dhála féin, Aonghus, nuair a bheidh deireadh le mo shíntiús, ní athnuafaidh mé é. In eagrán Lúnasa tá dhá phíosa le Gabriel Rosenstock agus dhá phíosa eile le Rachel ní Fhionnáin. An dealraimh ar an scéal, dar liomsa, go bhfuil cineál baghcat ar siúl faoi láthair ag roinnt mhaith scríbhneoirí i gcoinne na hirise.

Ar ndóigh, tá aithne agus ardmheas agam ar an iar-eagarthóir agus cuid mhaith dá shaothar foilsithe féin léite agam. Fear é, tráth a bhíonn rud le rá aige, go bhfeadfá bheith deimhin de nach gcuirfeadh sé fiacail ann.

Nuair a bhí mise gafa le bainisteoireacht taighde agus ceann grúpa nó stiúrthóir taighde seachtrach á earcú againn, dhéanaimis imscrúdú ar a dtugtar ‘dúthracht cuí’ (due diligence) air. Is rí-léir nach ndearna coiste Comhar a leithéid ar Aindrias nó bheadh a fhios acu agus sin déanta acu, nach duine é a ghlacfadh leis an gcineál trasnú a tharla i rith a eagarthóireachta. Is léir, freisin, nach ndearna Aindrias an t-imscrúdú céanna ar na daoine a bhí á earcú.

Fanfaidh mé le Feasta, ach cronóidh mé Comhar, mar ba ann a foilsíodh mo chéad iarracht scríbhneoireachta i nGaeilge, Nuala Ní Chonchúir a bhí mar eagarthóir ag an am. Agus mé ag dearcadh siar ar an bpíosa sin, is léir gur ghlac sí trua dom. “Píosa beagán ait,” a thug sí air agus muid i gcomhfhreagras níos déanaí sa bhliain sin. “An Bheochan” (The Quickening) a bhí agamsa mar theideal air an bpíosa sin agus ba é a bhí i gceist agam ann ná cathain a cruthaíodh an t-anam daonna!!!

aonghus said...

An mbeidh teacht ar an mBeochan Thall is Abhus amach anseo?

Ceist a scarann na scoláirí fós.