Muire na nGael

A Naomh Bríd a Mhuire na nGael, scar orainn do bhrat.

A Naomh Bríd a chroí na Féile, stiúir sin ar an mbóthar ceart.

A Naomh Bríd gheanúil ghrástúil, ar ár namhaid cosain sinn.

A Naomh Bríd a bhean rialta álainn, ar uair ár mbáis glaoigh orainn.


Táimid beagnach ar fad an an bport céanna inniu, Lá na Féile Bríde, Imbolc, tús earrach Éirinn más fíor!

Tarlaíonn sé gurbh í Bríd patrún bunscoil na gCailíní abhus (tá an dá scoil nasctha ó shin). Bhí an scoil ar fad ar Aifreann ar maidin, rud a mheabhraigh an nasc úd dom. Luaigh an sagart nós Bhrat Bríde - nach raibh cloiste agam roimhe, cé go bhfuil an scéal agam. Beidh ar mo chumas a rá leis go bhfuil an nós fós beo ag Proinsias! Níl freagra ceiste Fhearghuis agam - ná níl sé i sanasaíocht Chormaic ag Dennis.

De réir mo thuiscint tá baint aige le caoirigh, ach mar fhear cathrach....

Beidh suim ag Dennis san ceann seo a fuair mé in Ár bPaidreacha Dúchais (uimhir 533)

A Bhríd ban naomh, bean na bratóige buí,
ar choimrí a géaga gile dúinn
ón mbéile seo go dtí an béile arís
Ar choimrí Dé agus Bhríd' ban-naomh dúinn.
Bríd Ní Dhaighidí a chuireann an long
go réidh chuig poirt,
ar a coimrí sin dúinn féin
ós léi féin an oíche anocht

(Tá comhartha ceiste in ndiaidh a sloinne sa leabhair! Baiste diaga eile, is léir!)

Omnia Christus est nobis!

Inniu Féile San Ambrós, Easpag Milano agus Dochtúir de chuid na hEaglaise.

Thug an Pápa Benedict ceacht faoi ar a lá fhéile i 2007. Fathach d'Easpag, agus tá a leithéidí, a bhfuil teagasc agus saol ag teacht go foirfe le chéile, de dhíth go géar orainn in Éirinn agus ar fud na cruinne. Tá súil agam go bhfuil sé féin agus Pádraig mac Calprainn ag amharc anuas ar imeachtaí na laethanta seo, agus go dtabharfaidh an Cairdinéil Ó Brádaigh agus Ardeaspag Martin fuinneamh nua thar nais ón Róimh leo chun íonghlanadh na hEaglaise Chaitlicí in Éirinn a dhlúthú.

I dtreo is nach mbeidh gá leis an mana "Déan mar a deirid, ní mar a dheinid!"

San Ambrós, guí orainn!

---

Íomhá ón ghnáth fhoinse, dealbh Spáinneach ón 15ú Aois de Ambrós ag staidéir.

Lá Fhéile Mhaximilian Kolbe

Anaithnid , sa Réimse Poiblí, Féach nasc

atá ann inniu 14ú Lúnasa, an lá roimh Lá le Muire san fhómhair. Fuair Maximilian Kolbe bás ar son fear eile in Auschwitz - ach tá i bhfad níos mó i gceist lena shaol ná sin. Ba misinéir é ar feadh a shaol, agus bhunadh sé mainistreacha - i Nagasaki fiú - agus nuachtáin agus nithe eile. Tá (nó bhí, is dócha go bhfuil sé as cló) beathaisnéis i nGaeilge faoi: Ridire Mhuire gan Smál. Beathaisnéis an Athar Maximilian Kolbe, O.F.M., Conv. le Colmán Ó hUALLACHÁIN. Is dóigh liom go bhfuil cóip agam áit éigin; tá sé léite agam cinnte, agus leabhar Desmond Forristal - Maximilian of Auschwitz - freisin.

Eorpach Éireannach

Faoi Columbán Naofa a labhair an Pápa inniu.

Mar a dúirt mé cheana, tá a leithéidí de dhíth orainn!

N'fheadar an comhtharlú é bheith faoi chaibidil ag an bPápa an lá roimh an Reifreann? (Caolseans!)
Tá a chuid litreacha ar fáil ó CELT: (Litreacha i Laidin agus i mBéarla - tá níos mó ann freisin).

Éireannach Gorm

An bús ar fad faoi Bharack Obama, agus bunadh Mhuine Gaill a bheith ag tnúth leis an gcuradh mhír a bhaint de Bhaile Póirín, mheabhraigh sé arís scéal eile dom faoi "Éireannach Ghorm".



Tá cloigeann Múraigh le feiscint ar Armas an Phápa. Maraon leis an mbéar, is gnéithe iad seo de armas dheoise Freising mar a raibh Josef Ratzinger ina Ardeaspag sular ghairm Eoin Pól II chun na Róimhe é.

Tá baint acu araon le Naomh Corbinian.

Tá teoiric ann gur fhág boinn drochbhuailte liopaí ramhra ar íomhá den Easpag Chorbinian, agus gur ghlac dream níos déanaí leis gur Múrach a bhí i gceist. (Is léir go dtéann réamhchlaonta áirithe i bhfad siar!)

De réir sár leabhair Thomáis Uí Fhiagh, "Gaelscrínte san Eoraip" cé nach eol cé dár dhíbh é Corbinian, go bhfuil bunús sách maith leis an dtuairim go mba Gael é.

Lá Cholumbán Naofa

a bhí ann inné.
Fear ar mhó a chlú ar Mhór Roinn na hEorpa ná ina thír dhúchais.

Tá leabhrán de chuid Thomás Uí Fhiaigh agam ina bhfuil cuir síos gairid ar a shaol mar aon le tiontú Béarla ar chuid dá shaothar Laidine.

File, scoláire, manach, cainteoir teasaí agus spreagthach.

Ní raibh eagla air dul i ngleic le Prionsaí saolta ná eaglasta a linne.

Bhí alt ag comhalta de bhall Ord Cholumbán san Irish Catholic an tseachtain seo, inar luaigh de nath de chuid an Naoimh:

Más mian leat an Cruthaitheoir a thuiscint,
tuig créatúir

Feictear dom, cé gur réitigh an Eaglais an bealach don Eolaíocht ar an iliomad slite, go bhfuil rud éigin caillte againn san tsíor anailís a bhí leithéidí Columbán: sintéis nó tuiscint iomlán ar chúrsaí.

Tá díth daoine mar Columbán arís orainn!