A3L92

Agus mo phrintíseacht, mar dhea, curtha isteach agam ar F90/92, bhí sé in am don Gesellenstück. (píosa oibre a léiríonn go bhfuil a cheird foghlamtha ag ceardaí). Sraith U-bahn don Kleinprofil ab ea A3L92. Go teoiriciúil, ba ionann an trealamh, an ríomhaire agus an bogearra. Bhí de dhifear ann go raibh Siemens i gceannas seachas AEG. Agus F90/92 ag obair go maith, níor cheart go mbeadh dúshlán ag baint leis an gcoimisiúnú. Maith go leor, cionn is go raibh na tolláin níos lú, bhí eagar éagsúil ar an trealamh, níos lú spáis faoin traein don leictreonaic chumhachta agus trealamh eile.

Ach, go teoiriciúil is beag difear a dhéanfadh sé sin ná an meáchan éagsúil. Go teoiriciúil. Mo chuimhne, bhí difear eile - ag brú anuas a bhí an tiomsaitheoir srutha ar an trí ráille. Agus voltais dearfach ar an ráille seachas diúltach mar a bhí i gcás F90. 

Bhí roinnt réamhoibre le déanamh sa mhonarcha inar tógadh na traenacha, agus mé féin agus teicneoir Andreas, duine óg, ina bhun. Ní raibh aon morfhadhb leis sin. Ach ar leibhéal pearsanta ní raibh caidreamh ró mhaith eadrainn. Níor oibrigh an cheimic, mar a deir an ceann eile. Sin déanta, ar aghaidh linn go dtí an Betriebswerkstatt Grunewald. Atá lámh leis an Olimpia Stadion. Áit a raibh cluichí 1936 a reáchtáil. Tá sé fós in úsáid mar staid spóirt.

Tógadh an BW i 1913, nuair a bhí borradh faoin U-bahn i mBeirlín. Foirgnimh ealaíonta brící. Tá ag teip orm aon phictiúir le dealramh a aimsiú. Bhí tiománaí ar leith ag tiomáint na traenach. Feicim a aghaidh fós i mo chuimhne, ach tá a ainm dearmadta. Níl an jóc graosta a d'inis sé dom. Mhaigh sé gurb cruthúnas iad na litreacha BVG ar a éide, faoin bhéar cathair Bheirlín, gur baineann a bhí an béar. Bin vorne gespalten an brí leo, dar leis, i. Táim scoilte chun tosaigh.

Bhí cúpla teicneoir de chuid an BVG ag obair liom freisin. Ag an tús bhí bean ina measc, ach fuair sise deis obair sealanna a dhéanamh ar phá níos fearr, agus d'imigh sí. Ingo ab ainm don teicneoir sinsir. Ní cuimhin liom ainm an duine eile, ná an cuma a bhí air. Foirgneamh réamhdhéanta mar oifig againn - cé go raibh foireann ón BVG ag obair liom bhí fós na srianta céanna i gceist maidir le teacht ar an traic promhaidh. Is dócha gurb fhearr go raibh an mbean bailithe léi - bhí na leaideanna tar éis pictiúir de mhná nochta a chrochadh ar na ballaí. Ní raibh mé ró thógtha leis sin. (Measaim féin go raibh an bantarcaisne láidir go maith i measc fir sa Ghearmáin ainneoin a fhorásaí is a bhí an tsochaí, sílfeá). 

Ach nuair a chuaigh muid amach ar an traic promhaidh don gcéad uair - tubaiste. Bhí an voltais agus an sruth a bhí á mheas againn ag léim agus ag crith. Toisc go mbíonn baint ag sruth 50 Hz le córas comharthaíochta an iarnróid (ábhar mír eile sin) tá trealamh ann a scaireann an traein ón leictreachas má tharlaíonn sé go mbíonn barraíocht den sruth le minicíocht 50hz. Scaradh ón cumhacht an traein. Arís is arís. 

Fear Siemens meáite de go raibh fadhb tromchúiseach éigin sna bogearraí rialála. Go raibh an córas ag cruthú an gleo seo. Gurb orainne an locht. An teicneoir Andreas ag tacú leis. Míchompordach domsa. 

Faoi dheireadh, tháinig mé - nó b'fhéidir, ní cuimhin liom anois duine de na hinnealtóirí ar ais san oifig ar smaoineamh. Bhí dhá aonad stiúrtha i ngach traein. Ba cheart go bhfeicfeadh siad araon an voltais céanna. Mar sin, dá choscfadh muid ceann acu ó rialú agus amharc ar an voltais a thomhas sé, bheadh fhios éigin againn cá raibh an fhadhb. 

Chuir mé comharthaí voltais ón dá ríomhaire lámh lena chéile ar an trealamh tomhais. Agus féach, bhí an voltais san aonad nach raibh ag tiomáint i bhfad níos glaine. Bhí gleo éigin ann, ach b'shin toradh ar an ríomhaire eile ag iarraidh rialú de réir an voltais a bhí á thomhas aige. 

Cad sa diabhal a bhí ar bun? 

Bhí na braiteoir chun an voltais a thomhas ag brath ar éifeacht Hall. Sé sin, leathsheoltóir a bhí i gceist. Cruthaíonn sruth i sreang réimse maighnéadach. Bíonn éifeacht ag an réimse maighnéadach sin ar an sruth (eile) tríd an leathsheoltóir a bhí ina fháinne thart ar an gcábla. As sin d'fhéadfaí sruth, nó le beagán trealamh breise, voltais a thomhas. Ach bhí ionduchtóir mór mar chuid den dtrealamh freisin. Agus nuair a chuaigh sruth tríd sin, chruthaigh sé réimse maighnéadach láidir. Ba léir go raibh na braiteoirí ró ghar don ionduchtóir. Toradh ar an laghdú spáis faoin dtraein. (Ba ar Siemens an locht tar éis an tsaoil!). 

Níl fhios agam anois cé mhol an réiteach simplí. Is i dtreo áirithe a thomhaiseann an leathsheoltóir an sruth. Dá gcasfaí an braiteoir 90 céim, b'fhéidir nach mbeadh an éifeacht ag cuir as dó. Agus ní raibh... 

Scríobh mé cheana faoin obair a rinne mé ar rialaitheoir greamaitheachta. Thóg sé sin tamall maith eile... 

Ar lean... 

Botún cló le toradh tromchúiseach

I ndiaidh dom alt a scríobh inné faoi ríomhchlárú agus intleacht shaorga léigh mé an t-alt seo maidir le botún tromchúiseach i Chrome OS, a d'fhág daoine gan rochtain ar a ngléasanna.

Chuir an míniú mearbhall orm i dtosach - "&" in áit "&&" a bhí i gceist. Ní bheadh a leithéid tromchúiseach i C - cé go bhféadfadh sé toradh mícheart a thabhairt. Is éard is ciall le "&" le dhá oibreann i C ná agus de réir giotáin - beidh an giotán san toradh fíor má tá an ghiotán san dá oibreann fíor. Mar shampla, ag úsáid uimhreacha déanárta:

0b1010 & 0b1011 => 0b1010.

ach

0b0101 & 0b1010 => 0b0000

I C ciallaíonn && agus loighice; má tá an dá oibreann fíor, beidh an toradh fíor. Níl an luach ar fíor sáinmhínithe, is ionann aon luach nach náid agus fíor. Go hiondúil, is 1 a bhaineann an tionsaitheoir feidhm as mar fíor.

Mar sin is ionann

0b1010 && 0b1011 = (0 != 0b1010) && (0 != 0b1011) => FÍOR = 1

agus

0b0101 && 0b1010 = (0 != 0b0101 ) && (0 != 0b1010 ) => FÍOR = 1

Bhí corr eile i gceist leis an bhfadhb a tháinig chun cinn i gcás Chrome, áit a bhfuil C++ in úsáid, agus brí beagáinín éagsúil i gceist le & agus &&. 

Tá feidhm loighice acu araon; ach má tá an oibreann ar chlé bréagach, ní dhéanann && an oibreann ar dheis a ríomh in aon chor. Seo, is, cosúil, an feidhm a spreag an fadhb.

std::string VaultKeyset::GetLabel() const {

  if (key_data_.has_value() & !key_data_->label().empty()) {

    return key_data_->label();

  }

  // Fallback for legacy keys, for which the label has to be inferred from the

  // index number.

  return base::StringPrintf("%s%d", kKeyLegacyPrefix, legacy_index_);

}

Dá mbeadh && úsáidte, agus dá mbeadh key_data_.has_value() bréagach, ní ríomhfaí in aon chor key_data_->label().empty(). Déanaim amach, sa chás go raibh an chéad oibreann bréagach, nach mbeadh an dara ceann bhailí, agus go mbeadh fabht ann dá ndéanfaí iarracht é a ríomh.

Is cosúil, dar liom, go raibh feidhm nua a thabhairt isteach diaidh ar ndiaidh, ach go raibh an sean feidhm ("legacy keys") de dhíth dáiríre. Shamhlóinn freisin gurb é sin an chúis nár aimsigh na scrúdaithe an fhadhb sular scaoileadh é - go raibh siad ag díriú ar an feidhm nua a bheith ag obair ceart. Ba cheart ar ndóigh bheith cinnte, má tá seanfeidhmeanna in úsaid, nach bristear iad. Ach is éasca do forbróir dearmad a dhéanamh ar an tsean-rud!

Is minic, san ríomhchlárú, go mbíonn fabht tromchúiseach mar thoradh ar bhotún fánach mar seo. 

Neamhuimhreacha

Ar chúis éigin inniu tháinig físeán de charr rásaíochta uathoibríoch suas ar m'amlíne Twitter, cúpla uair. Chomh luath agus a thosaigh an carr, chás sé go tréan ar dheis agus le lánluas isteach sa bhalla.

Tá cuir síos ar an eachtra, mar a rinne duine de hinnealtóirí iarracht é a mhíniú, san alt seo.

Mháigh sé gur tharla fabht éigin le linn do tiománaí daonna a bheith ag tiomáint ar an gcúrsa chun an carr a ullmhú, a d'fhág NaN - neamhuimhir - mar cheann de na hathróga isteach san rialaitheoir. 

Os rud é nár shíl siad go bhféadfadh a leithéid tarlú - nó go deimhin nár rith sé leo - ní raibh na bogearraí cosanta ann chun é chosc, mar a bheadh dá mba ghnáthuimhir é ach as an raon ceaptha.

Luaigh sé go raibh an luach fabhtach le feiceáil ar an scáileán acu - ach go raibh na céadta luach eile ann agus nár tugadh faoi deara é. 

Luaigh sé freisin gur dearadh an rialóir le Matlab. 

Ach cén saghas ainmhí neamhuimhir? Oibríonn ríomhairí le méad áirithe giotán. Uaireanta is slánuimhreacha atá i gceist. Ach tá teorainn leis an raon uimhreacha is féidir a chuir in iúl leo sin.

Modh eile ná snámhphointe. Ní chuireann sé sin níos mó luachanna éagsúla ar fáil, ach is féidir réimse níos leithne luachanna a chuir ar fáil. 

Seachas an giotán is lú seasamh do haon, an ceann in aice leis do 2, 4 agus mar sin de, tá machairí éagsúla san "focal" 32 (nó níos minice 64) giotán.

Úsáidtear nodaireacht atá cosúil leis an nodaireacht eolaíochta -

ach gur uimhreacha dénártha atá i gceist. 

Bíonn trí mhachaire i gceist, giotán amháin don sínghiotán - a chuireann in iúl an diúltach nó dearfach atá an uimhir. Ansin méid áirithe giotán don easpónant agus méid eile don maintíse. Is ionann an uimhir atá á chur in iúl agus sín * maintíse * 2 ^ easpónant. Tá cleasanna eile i gceist chun an fheidhm is fearr a bhaint as an gcóras. Ach ní chuige sin atá mé anocht, ach chuig neamhuimhreacha. 

Nuair a ríomhtar feidhmeanna éagsúla, is féidir leis an toradh a bheith i bhfad ró mhór le cuir in iúl - éigríoch fiú. Mar sin tá patrún ar leith giotáin do éigríoch dearfach nó diúltach. Ach tá feidhmeanna eile nach bhfuil aon toradh matamaitice leo - náid roinnte ar a náid, abair. Neamhuimhreacha iadsan, agus tá patrún ar leith curtha ar leataobh dóibh sin. An rud a tharlaíonn san ríomhaire ansin ná go mbíonn neamhuimhir mar thoradh ar aon obráid a bhfuil neamhuimhir i measc a ionchur. An ciall atá leis sin ná gur féidir le bogearraí cosanta aithint gur tharla meancóg agus beart ceartaithe a ghlacadh. 

Ar ndóigh, mura bhfuil an chosaint sin ann... 

Gné eile den bhfabht seo ná an dearadh le matlab. Níl fhios agam go díreach cad atá i gceist acu, mar is uirlis cumhachtach deartha Matlab, a bhfuil codanna éagsúla de chun críochanna éagsúla. Tá taithí agam ar córais rialaithe a bheith á ndearadh i rud darbh ainm Simulink, cineál córas inár féidir blocanna caighdeánach de feidhmeanna matamaitice a chuir le chéile i bpictiúr, agus ansin cód don ríomhaire neadaithe a ghiniúint. I gcás mar sin déantar go leor den promhadh ar ríomhaire an dearthóra, seachas ar an ríomhaire neadaithe. 

Ach ní chaitheann ríomhaire pearsanta le huimhreacha snámhphointe díreach ar an dóigh céanna le ríomhaire neadaithe - agus go minic ní hionann na leabharlanna tacaíochta bogearraí matamaitice ar an dá chóras. Mar sin tharlódh an aschur a bheith éagsúil ainneoin an ionchur céanna. 

Ba cheart mar sin an promhadh deireadh a dhéanamh ar an ríomhaire neadaithe. Ach an rud faoi promhadh ná nach dtig leis ach fabhtanna a aimsiú - ní thig leis cruthú nach bhfuil aon fhabht ann. 

Ach go hiondúil bíonn an cód a gintear as matlab iontach casta agus gann ar na rudaí a dhéanann cód soléite - ainmneacha ciallmhaire ar athróga agus tagairtí ag míniú cad atá á dhéanamh, nuair nach bhfuil sé sin soiléir (agus is minic nach mbíonn). 

Is ait liom nach raibh bogearra cosanta ann chun breith ar NAN nó ar a laghad rud eile a léireoidh mar fabht é ar na scáileáin eolais - cúlra dearg nó a leithéid. 

Ba cheart don ríomhchláraitheoir cúramach feidhmiú go doirbhíoch - amharc gach treo agus bóthar aontreo á thrasnú aige. 

Tá "fadhb nár chuimhnigh muid air" le fáil i ngach tuairisc ar thubaiste a raibh bogearraí ina lár. 

Agus sin mo racht go n-uige seo.