Tá Fionn i mbun máistreacht san Opera faoi láthair agus is chun am a chaitheamh ina chomhluadar a bhí sé beartaithe againn lá i chaitheamh i Londain ar an slí chun na Fraince. Bhí a am siúd sách gann áfach! Tá jab rialta (íoctha) aige ag canadh le cór in eaglais de chuid Eaglais Shasana sna bruachbhailte, rud a d'fhág ceangal air imeacht go moch ar maidin Domhnaigh. Nuair a d'éirigh muidne chuaigh muid go Marylebone, áit a bhfuil an Acadamh Ríoga Ceoil chun bualadh le Fionn ar ball. Chaith muid bricfeasta blasta i gcaife - Souli. Bhí sé beartaithe againn Aifreann meán lae a éisteacht. Bhí thart ar uair an chloig roimhe sin, mar sin thug muid cuairt ar Chnuasach Wallace. Thug muid neamhaird ar an dtaispeántas ar leath faoin mbanríon Eilís agus a cuid corgi, agus dhírigh isteach ar na hearraí agus an ealaíon ó na Meánaoiseanna. Bhí an áit ag cuir thar moill le rudaí spéisiúla. Scrín cloig as Tír Chonaill ina measc!
Séipéal ana dheas is ea séipéal Shéamuis Aspal. Sa stíl gotach a tógadh é, ag deireadh an 19ú céad, ach bhí séipéal Chaitliceach, bainteach le hambasáid na Spáinne, ar an láthair i bhfad roimhe sin. Tá roinnt de na saothair ealaíne ársa dá réir. Sagart measartha óg, atá ina shéiplíneach ollscoile, a léigh an Aifreann. Domhnach na ngairmeacha crábhaidh, Domhnach an Tréadaí maith a bhí ann. Bhí an sagart paróiste san ollscoil dá réir, ag iarraidh gairmeacha a spreagadh, toisc an cúram sin a bheith air. Bhí an séiplíneach tagtha ina ionad. Thug sé aitheasc measartha spreagúil, ag tarraingt as a thaithí féin agus go háirithe an ról a d'imir oilithrigh teaghlaigh chuig scrín meánaoiseach ann.
Is in Acadamh Ríoga an Cheoil atá Fionn i mbun staidéir, agus tar éis dúinn dul ann chun bualadh leis bhí greim lóin againn le chéile. Ansin thug sé turas an fhoirgnimh dúinn. Tá halla mór ceolchoirme ann agus amharclann beag Opera. Cúram ar leith déanta de chúrsaí fuaime ann (ar ndóigh!).
Neart ealaíne ar na ballaí agus sna dorchlaí. Ina measc sraith múrphictúir san forhalla ag léiriú modhanna ceoil. Iarsmalann le huirlisí ceoil stairiúla, a bhí dúnta dáiríre ach a raibh cuid mhaith den ábhar taispeántais le feiceáil mar sin féin.
Fad is a bhí Fionn i mbun an cleachtadh treoraithe chuaigh mé féin agus Freddie ag siúil i Regent's Park a bhí díreach lámh leis. Meascán deas de gharraíodóireacht agus fiántas sna lusanna. Ní fhaca mé oiread nóinín ar faiche cheana - ba gheall le brat sneachta iad! Éanlaithe uisce coitianta agus neamhchoitianta. Chonaic muid ál góislíní a bhí glas, geal leis. Chuaigh muid amach i dtreo Sráid Baker. Bhí scuaine fhada ag iarraidh dul i gcomhairle le Séarlóg de Hoilm. Ní raibh a chomhairle de dhíth orainn, ach bhí uachtar reoite. Rud a fuair muid.
Ansin chuaigh muid féin, Fionn agus cara leis go dtí margadh Spitalfields. Ar an ndrochuair, bhí formhór na seastáin ag dúnadh ach fós bhí neart spéisiúil le feiceáil ann. Faoi dheireadh chuamar ag lorg bia. Chaitheamar dinnéar blasta i bproinnteach Gréagach sa mhargadh.
Ansin ar ais go dtí Árasán Fhinn, ag faire ar scannán roimh dul a luí. Lá fhada taitneamhach!
.
